Besucherzähler seit 30. Juli 2002
Impressum:
Chabis Schtoorzä Bäfzger Belp
Mini-Bäfzger Belp
3123 Belp
Web: www.guggebelp.ch
Mail: info@guggebelp.ch
05/12/12
Saison-Start 2012!
Sodeli... d'HV isch düre und mir starte einisch meh mit vouem Tatedrang ine nöii Saison.
Mit Applous hei mir üse Präsi wie ou dr «bewährt» Vorstand wieder gwäut und fröiie üs ufene wieteri luschtigi und fägigi Fasnachts-Saison...
PS: Mir si immer interessiert a nöiie Mitglieder uf aune Regischter. Wenn de auso Freud und Luscht hesch ire unkomplizierte Gugge mit ds'mache de wär jetzt die beschti Zyt derfür... Mäud di eifach bi üsem Präsi...
Bis baud und SWING YOUR CHABISGRING!
03/12/12
Season's End Eisbahn Gurnigelbad, 11. 3. 2012
Isch doch mau ganz ä andere Saisonabschluss gsi :-)
Leider hets nid so viu Lüt gä bim däm Saisonabschluss vor Isbahn Gurnigelbad. Aber ä ussergwöhnleche Ort zum spiele isches sicher gsi.
Mir danke dr Organisation für d'Iladig und natürlich o für die feini Verpflegig überem "offene Füür". Isch auso fein gsi...
02/27/12
Bärner Fasnacht, 25./26.2.2012
Leute, das wars schon wieder...
Üsi Fasnachts-Saison isch scho wieder verbiiii... Leider.
Ds'Wätter für die Fasnachtstäg het aber nid chönne besser si. Nid ds chaut und o nid ds warm... Mir hei doch wieder super Uftritte häregleit, oder?... Am Samschtig hei mir zum Abschluss no einisch aues gä im Narretämpu... Eifach Hammer gsi!
Mir heis mau versuecht mit früeh höre spiele am Samschtig. Viellech het sich das bewährt?... D'Stimmig ir Houptgasse isch leider o scho früeh kippet und mit dr Gugge derdür wär nüm luschtig gsi... Mir rede us Erfahrig...
Derfür hei mir grad aschliessend nachme Umzug ir Gass ds Publikum chönne begeischtere mit üsne Uftritte...
Danke viumau aune Bäfzgers u natürlech üsne Fans für die tolli Zyt und Unterstützig!!
Danke o viumau ar Tina und am Märcu, wo für üs die super Föteli u Fiumli hei gmacht und mit üs mitzoge si!!
02/20/12
Fasnacht Bassersdorf, 18./19.2.2012
Schatzi schenk mir ein Foto...
oder so... :-)))
Hey, Bassersdorf isch ja mau angers geil gsi... Eifach dr Hammer. Das isch öppe no Fasnacht. Ds ganz Dorf abgsperrt und sämtlichi Iwohner verchleidet uf dr Gass. Und irgendwo tuckeret äs Pirateschiff umenang, oder dr Stier wo sech ä Wäg dür d'Mängi suecht, und die unermüedliche Jogger. So guet. D'Feschtzäut si "bummsknütschet vou" gsi. Mir si froh gsi si, dass mer überhoupt si inecho zum spiele... Mega-Stimmig... Was wosch meh!
Und no ä CSB-Guggepremiere: am Sunntig Morge hei mir dr Guggegottesdienst vo Bassersdorf musikalisch begleitet... Mau öppis angers...
U aschliessend isch es de grad a gross Umzug mit ca. 50 Startnummere gange. Mit Startnummere 34 si mir hingerem Atomkraftwärk und em Flower-Power Wage ungewägs gsi... Da isch Konfetti-Räge garantiert gsi... Dr krönend Abschluss isch no d'Heifahrt gsi. Die Party-Stimmig vo Bassersdorf hei mir grad mitgnoh bis uf Bäup... 1,2,3,4...
Danke am FAKOBA für d'Iladig und die fägigi Fasnach, wo mir bi euch hei dörfe erläbe...
02/20/12
Auftritt Fasnacht Ittigen, 17.2.2012
Churzfrischtig si mir ar Ittiger Fasnacht für ne Uftritt igschprunge...
Churz aber heftig ;-)
Merci für d'Iladig... Het gfägt...
01/29/12
Fasnacht Burgdorf, 28.1.2012
Burgdorfer Fasnacht isch o Gschicht. Na ja...
Auso, üsi Uftritte si trotz reduzierter Bsatzig nid schlächt gsi... Um Mitternacht hei mir im Feschtzäut no einisch aues gä und d'Guggefans zum tanze bracht..
Mir fröiie üs ömu scho uf üsi nächschte Aläss Ittige und Bassersdorf :-))
01/22/12
Belper Fasnacht, 21.1.2012
Mit acht Uftritte hei mer äuä eini vo de meischt gschpielte Fasnachte erläbt! 6 offizielli ufem Feschtgländ und 2 inoffizielli i üsem Stammlokal.
Das het scho grad ä chli ds "biiesse" gä... :-))
Aber äs het gfägt und mir hei ganz gueti Uftritte häregleit. Vor auem üse lescht Uftritt am haubi 12 isch eifach geniau gsi. D'Zueschour heis üs dankt...! Hammer gsi!! Mir hei üs gloubs nid müesse verstecke hinter de "grosse" Guggene wo vor und nach üs Uftritt hei gha!
Danke dr Organisation vor Bäuper Fasnacht! Dr Alass isch super organisiert gsi und d'Spielzyte hei dr ganz Tag super klappet... Äbeso hets am Namittag keni "tote" Zyte gä und äs isch immer öppis los gsi...
01/15/12
Fasnacht Münsingen, 14.1.2012
Bi mega schönem Wätter und iis-chaute Temparature si mir am Namittag am Umzug gloffe und hei ufem Feschtplatz no chönne ä Einzuuftritte härelege.
Mir si aber froh gsi, dass mir nächhär am Abe hei ine chönne und zwöi Uftritte im Saal und eine im Rest. Trube hei dörfe zum Beschtä gäh...
D'Fasnachtsbsuecher vor Ort hätte ruhig ä chli meh Stimmig dörfe mache, aber was söu's; mir Bäfzger hei "intern" ;-) uf auii Fäu fun gha und ganz gueti Uftritte häregleit...
11/12/11
11.11.11, 11.11 Uhr
Zu üsem Jubiläumsjahr derzue hei mir ä mega cooli und fägigi Fasnachtseröffnig chönne dürefüere. Punkt 11.11 Uhr hei mir d'Fasnacht ufem Chrüzplatz ikesslet. Wieter hei mir dr Coop-Platz musikalisch "beläbt" und si aschliessend vor üses Stammlokal ds Kiora ga usklinge. Ds Wätter het gschtumme, dr Sound het gschtumme, d'Lüt hei gschtumme... eifach genial gsi...
Am Abe isches de no einisch so richtig abgange. Vier geili Uftritte, super Stimmig, super Lüt, und feins ässe! Was wei mir meh :-))
Mir danke aune, wo üs derbi unterstützt hei und dr Wäg zu üs "gfunde" hei ;-) Äs grosses Merci geit natürlich a ds Kiora-Team für d'Gastfründschaft, die feini Verpflegig und Super-Service!! Äs het mega Spass gmacht mit euch aune.
>> zu de Biudli vom Eufte Eufte
09/04/11
Jubifest 11 Jahre CSB...
So... Üses Jubi-Fescht isch leider scho wieder Gschicht...
Was wei mer säge: Ir Prärie-Bar hei mir eifach äs unvergässlechs Jubi-Fescht dörfe fiire. Äs het mega gfägt... Bi heisse Temparature und äre willkommene nasse Abchüelig am Abe isch d'Stimmig immer super gsi und d'Prärie het "wortwörtlich" koched :-)
Mir danke aune Häufer, Guggemusige Pulswärmer, Notefrässer und Guggemotzer, am DJ Chnube sowie ar Prärie-Bar (Jogi und Rita), Sanitäter Didi, de Sponsore und de Bronco's-Security ganz härzlech für d'Ungerstützig, für ä cool Guggesound, d'Unterhautig, d'Sicherheit und "eifach" für dä fägig Tag!
Witer danke mir üsem Speaker Dänu Nydegger, wo dr Spielplan und d'Zyte im Griff het gha und churzfrischtig no äs Monschter-Konzärt zum Abschluss het organisiert!!
uf die nächschte 11 Jahr CSB!
08/22/11
Probeweekend Zweisimmen 2011
'Schwitz, Ächz, Stöhn'...
Das isch ja mau äs heisses Weekend in Zwöisimme gsi. Da het aues lüfte vom Probelokal nümme gnützt. Aber mir hei gliich aues gäh. So hei mir wieder cooli nöii Stück dörfe istudiere bestehendi Stück wieder chönne uffrüsche.
Näbem Musik mache hets zur Abwächslig o wieder ä Trotti-Abfahrt vom Rinderbärg gä und die wo ä Abchüelig gsuecht hei, hets zum Glück näbem Musikhuss no grad ä erfrüschende chüele Bach gäh!
09/09/10
Unser Gugge-PIN...
Die «zytlose» Chabis Schtoorzä Bäfzger-Pins chöi mir zum Priis von Fr. 5.— abiete. Choufe chöit dr die bi aune kommende Aläss vo de CSB.
Mit emene Chouf ünterstützet dir üse Verein und dermit ou ä Teil vom kulturelle Läbe in Belp. D'Azahl isch jedoch beschränkt.
Mir danke scho jetzt für öiies Engagement.
Unsere nächste Aktivität:
>> Zur Zeit keine Auftritte...
Optimiert für folgende Browser:
